ИИМ ЫААО кызматкерлери үчүн биринчи жардам көрсөтүү боюнча жабык тренинг

«Акушердик иш» бөлүмүнүн декадасынын алкагында «Хирургия» сабагынын окутуучусу Кучерова В. Н. КЛД-32 тайпасынын студенттери менен биргеликте «Биринчи  жардам көрсөтүү» темасында жабык практикалык тренинг өткөрдү.

Иш-чара ИИМдин ЫААО бөлүмүнүн кызматкерлери үчүн уюштурулуп, өзгөчө тобокелдик жана өзгөчө кырдаалдар шартында шашылыш медициналык жардам көрсөтүү көндүмдөрүн өркүндөтүүгө багытталды.

Тренингдин жүрүшүндө катышуучулар шашылыш абалдардагы негизги аракеттердин алгоритмдерин карап чыгышты, кан токтотуу, жүрөк-өпкө реанимациясын жүргүзүү, жаракаттарды иммобилизациялоо жана ар кандай жаракаттарда жардам көрсөтүү боюнча практикалык көндүмдөрүн иш жүзүндө аткарышты.

КЛД-32 тайпасынын студенттери практикалык манипуляцияларды активдүү көрсөтүп, өздөрүнүн теориялык билимдерин бекемдөөгө жана күч түзүмдөрүнүн өкүлдөрү менен иштөө тажрыйбасын алууга мүмкүнчүлүк алышты.

Бул тренинг ведомстволор аралык кызматташууну чыңдоого, келечектеги медициналык адистердин даярдык деңгээлин жогорулатууга жана өзгөчө кырдаалдарда биринчи врачка чейинки жардам көрсөтүү боюнча туруктуу көндүмдөрдү калыптандырууга өбөлгө түзөт.